Алматыға 81 млн теңгелік туристік терминалдар орнатылады

Алматыда туристер үшін құны 81 миллион теңгелік ақпараттық терминалдар орнатылады. Жаңа технологиялардың көмегіне сүйеніп, смартфондар арқылы ақпарат іздеп үйренген шетелдіктерге терминал қаншалықты қажет?  

Алматы қаласы туризм саласын дамытуда жаңа жобалар жыл сайын қолға алынады. Оның бірі шет елден келген меймандарға арналған ақпараттық терминал. Аталған қаражатқа небары 10 электронды терминал алынып, туристер көп жүретін жерлерге қойылады деген жоспар бар.

Қалалық туризм басқармасы басшысының орынбасары Марат Айнабеков терминалдардың тиімділігне сенімді. Оның айтуынша бұл шешім келген туристермен жүргізілген сауалнамалар негізінде қабылданған.

«Сол себептен оларға арнайы қосымша жүктемей, арнайы әрекеттер жасамай кез-келген стендттің жанына келіп, өзі керегінше ақпарат алып, туристік бағыттарын жоспарлай алады», - дейді Марат Айнабеков.

Терминалды жасау, орнату бойынша конкурс 16 ақпанда жарияланған. Жоба бойынша ондағы мәлімет 20 тілде болуы керек. Онда қаланың көрікті жерлері, тарихи нысандар, мәдени ошақтар мен қонақүйлер туралы ақпараттар болады. Бұған қоса полиция, құтқару және жедел жәрдем шақыру қызметі бар.

Қазіргі мәліметтер бойынша Алматыға былтыр 163 мың шетелдік келген. 2019 жылмен салыстырғанда туристердің келуі 72 пайызға аз. Ішкі туризм де 34 пайызға азайған.