Алматы 2023-24 жылдар аралығында ШЫҰ-ның мәдени және туристік астанасы болуы мүмкін

Үндістанда Шанхай Ынтымақтастық Ұйымына мүше мемлекеттердің туризм әкімшілігі басшыларының кездесуі өтті. Қазақстандық делегацияны ҚР Мәдениет және спорт вице-министрі Ержан Еркінбаев басқарды.

Шараға Үндістан, Қытай, Қырғызстан, Өзбекстан, Тәжікстан, Ресей және Пәкістан елдерінің өкілдері де қатысты. Тараптар туризм саласындағы ынтымақтастықты нығайтуға және ШЫҰ елдерінде осы саланы бірлесіп дамытуға бағытталған бірнеше құжатқа қол қойды.

Вице-министр айтқан ұсыныстардың бірі ШЫҰ мемлекеттерінің туристік әлеуетін ірі халықаралық іс-шаралар өтетін жерлерде, оның ішінде ортақ стендтерде ілгерілету бойынша күш-жігер біріктіру болды.

Сондай-ақ Ержан Еркінбаев Алматыны 2023-2024 жылдарға арналған ШЫҰ-ның мәдени және туристік астанасы деп жариялауды ұсынды.

— Бүгінгі таңда біз ШЫҰ елдерімен барлық салаларда ынтымақтастықты дамыту мен нығайтуда оң үрдіс байқаймыз, туризм де бұдан тыс емес. Бүгінгі күні Қазақстанда визасыз режим 79 елдің (оның ішінде ШЫҰ-ға мүше барлық мемлекеттердің) азаматтары үшін жарамды, бұл тізімді 100 елге дейін кеңейту жұмыстары жүргізілуде, 100-ден астам әуе бағыттарында 30 мемлекетпен тікелей рейстер бар, - деді Ержан Еркінбаев.

2023 жылдың шілдесі мен 2024 жылдың шілдесі аралығында Қазақстан Шанхай ынтымақтастық ұйымына төрағалық етеді.