Алимент төлемеген азаматтар құмар ойынын ойнап келген

Елорда прокуратурасы алимент төлеуден жалтарған борышкерлердің құмар ойын ойнайтынын анықтады, деп хабарлайды Orda.kz. 

Прокуратураның мәліметінше, 150 борышкердің өз балаларына 350 млн теңге қарыз бола отырып, құмар ойындарға қатысқаны анықталды.

Биылғы жылы алимент қарызы 2,5 млн теңге болған борышкерлердің бірі букмекерлік кеңсе арқылы 80 млн теңге жеке айналыммен құмар ойындарға қатысқан.

Прокуратураның қадағалау актісі бойынша жеке сот орындаушылары 150 борышкерге құмар ойындарға қатысуға тыйым салды. 

Бұл шектеудің жаңа түрі борышкерлердің ақшаны орынсыз жұмсауына жол бермейді.