Әлия Назарбаева сотта жеңіліп қалды

Қазақстаннның экс-президенті Нұрсұлтан Назарбаевтың кенже қызы Әлия Назарбаева қазақстандық кәсіпкерлер Нұрлан Бимурзин мен Медғат Қалиевке қарсы сотта жеңіліп қалды.

Бұл туралы ҚазТАГ хабарлайды.

Нұрлан Бимурзиннің айтуынша, Назарбаева адвокаттары арқылы Бимурзин мен Қалиевтің үстінен жала жабу туралы шағым түсіріп, олардың жауапқа тартылуын талап етті. Алайда өткен аптада сот құқық бұзушылық белгілерінің болмауына байланысты істі тоқтатты.

Ақпан айында Медғат Қалиев пен Нұрлан Бимурзин Бас прокуратураға Әлия Назарбаеваны рейдерлік шабуыл жасады деп айыптап арыз жазған.

«Бізді қолдаған барлық жанашыр азаматтарға алғысымды білдіргім келеді. Заңды да әділ шешім шығарған сот жүйесіне ерекше алғыс білдіремін. Төрт ай бойы бір құзырлы органнан екінші органға жолданған арызымыз әділ нәтижеге жетпейді деп ойладық. Алайда, Қазақстан Республикасының Жоғарғы Соты заңды басшылыққа алатынын дәлелдеді. Қазақстан Республикасы Ішкі істер министрлігі процессуалдық шешім қабылдау үшін жолданған өтінішімізді қарайды деп үміттенеміз», – деді Бимурзин.

Еске салсақ, 28 ақпанда Бимурзин өзінің серіктесі Қалиевпен бірге Назарбаева мен Рогованың рейдерлік шабуылының құрбаны болғанын хабарлаған болатын.