«Әлиев Путинді қорқытты»: Әзірбайжан Украинаға көмек ретінде қомақты қаражат жібереді

Ильхам Әлиев Украинаға көмек ретінде 2 миллион доллар қаражат бөлуді бұйырды. Ақша электр жабдықтарына жұмсалады, деп хабарлайды Orda.kz. 

Бөлінген қаражат Әзірбайжан өндірісінің электротехникалық жабдықтарын Украинаға жеткізу үшін энергетика министрлігінің қарамағына түседі.

Әзірбайжан бұған дейін SOCAR шабуылдарына байланысты Украинаға қару-жарақ жеткіземін деп Ресейді қорқытқан еді. Әзірбайжан билігі SOCAR мемлекеттік компаниясының нысандарына ресейлік шабуылдар жалғаса берсе, түпкілікті шешім қабылданатынын ескерткен.

10 тамызда Украина президенті Владимир Зеленский Әзірбайжан президенті Ильхам Әлиевпен телефон арқылы сөйлесті. Көшбасшылар Ресей шабуылана ұшыраған SOCAR нысандары мен Әзірбайжан газын Украинаға тасымалдайтын газ компрессорлық станциясының жағдайын талқылады. 

Зеленский Ресейдің шабуылын Украина мен оның еуропалық серіктестерінің тәуелсіздігін қамтамасыз ететін энергетикалық жолдарды бұғаттау әрекеті деп атады. Екі көшбасшы да энергетикадағы ынтымақтастық кез келген жағдайда жалғасатынын атап өтті.

Айта кетейік, Әзірбайжан AZAL әуе компаниясының ұшағы апатына байланысты Ресейге қарсы халықаралық соттарға жүгіну үшін құжат әзірлеп жатыр.