Әлемге әйгілі модельер Джорджо Армани өмірден өтті

Итальяның модельері Джорджо Армани өз үйінде дүниеден озды. Оның жасы 91-де еді. Ол 28 қыркүйекке жоспарланған сән көрсетіліміне дайындықпен айналысып жүрген болатын, деп хабарлайды Orda.kz.

Бұл туралы 4 қыркүйекте италиялық La Repubblica газеті мен компанияның баспасөз қызметі хабарлады.

«Джорджо Армани әрқашан ойындағасын ашық айтатын. Ол үшін ең бастысы – киімін киген адамдар еді. Содан кейін ғана сән, трендтер мен уақытша ағымдарды бағалайтын» деп жазды басылым.

Компания өкілдері дизайнердің соңғы күндеріне дейін жұмыс істеп, коллекциялар жасаумен және брендті дамыту ісіне белсене араласқанын атап өтті. Арманимен қоштасу рәсімі 6 және 7 қыркүйекте Миландағы Teatro Armani-де өтеді. 

Армани 1934 жылы Италияның солтүстігіндегі Пьяченца қаласында дүниеге келген. Ол 1975 жылы сәулетші Серджо Галлеоттимен бірге өзінің сән үйін ашты. Armani бренді италиялық әсемдіктің символына айналып, әлемдегі ең табысты брендтердің бірі болды. Компанияның жылдық табысы 2,3 миллиард еуроға бағаланады.