Алексей Цой үкімет отырысында денсаулық сақтауға байланысты мәселерді көтерді

Үкімет отырысында ҚР Денсаулық сақтау министрі Алексей Цой пациенттерге қызмет көрсету саласындағы өзекті мәселелерді атап өтті.

— Қабылданып жатқан шараларға қарамастан шешуді талап ететін мәселелер бар. Пациенттер деңгейінде бұл көрсетілетін қызметтердің сапасы, коммуникацияның әлсіздігі, мамандарға кезек, медициналық қызметтер көлемінің жеткіліксіздігі, жоғары технологиялық және қымбат тұратын қызметтерге қолжетімділік, тар шеңберлі мамандардың тапшылығы, халық саны 300 адамнан аз ауылдарда медициналық ұйымдарды, дәріхана пункттерін дамыту қажеттілігі.

Министірдің айтуынша, алғашқы медициналық-санитарлық көмек саласында да бірқатар мәселелер бар.

— Жан басына шаққандағы қаржыландыруды жетілдіру талап етіледі. Цифрландыру толық аяқталған жоқ, бүгінде медициналық ұйымдарды интернетпен қамтамасыз ету аудандық деңгейден 84,2% - ды құрайды. Сондай-ақ медициналық ақпараттық жүйелерді интеграциялау қажет. Кадрлық әлеуеттің, әлеуметтік кепілдіктердің жеткіліксіздігі және жалақының төмендігі орын алуда.

Министрдің айтуынша 211 денсаулық сақтау нысанын салу жоспарлануда.

— 2021 жылы 211 нысан, оның ішінде 83 медициналық пункт, 70 фельдшерлік-акушерлік пункт, 57 дәрігерлік амбулатория және 1 емхана салу жоспарланған. 2025 жылдың соңына дейін 600-ден астам, оның ішінде ауылдардағы 584 алғашқы медициналық-санитарлық көмек нысаны күрделі жөндеуден өтеді.