Алдағы президенттік сайлау жаңа саяси дәуірге есік ашады – Тоқаев

Мемлекет басшысы Қасым-Жомарт Тоқаев алдағы президенттік сайлау жаңа саяси дәуірге есік ашатынына сенімді.

— Жаңа модель биліктің тұрақты айналымын қамтамасыз етеді және қазіргі қазақстандық мемлекеттіліктің одан әрі демократиялық дамуын бекітеді. Бірнеше аптадан кейін кезектен тыс президенттік сайлау осы өзгерістерді ескере отырып өтеді. Бұл сайлау Қазақстанда жаңа саяси дәстүрді қалыптастырады, жаңа саяси дәуірді ашады, - деді Тоқаев шетелдік дипломатиялық миссиялардың басшыларымен кездесуде.

Ол ел билігінің басты мақсаты ретінде әрбір азаматқа өз әлеуетін іске асыруға тең жағдай мен мүмкіндіктер жасалатын Әділетті Қазақстан құрылысын белгілегенін түсіндірді.

— Әділет идеясы бұдан былай Қазақстанның халықтың әл-ауқатын арттыруға, азаматтардың сұраныстары мен өтініштеріне жедел жауап беруге бағытталған бүкіл мемлекеттік саясатының өзегіне айналады. Мен және менің әкімшілігім ашық және әділ президенттік сайлау өткізу үшін барлық жағдайды қамтамасыз етуге бел байладық, - деді Тоқаев.