Алдағы онжылдықта жаһандық әскери қақтығыс басталады – ОББ

Орталық барлау басқармасы (ЦРУ) ғаламшардағы климаттың өзгеруіне байланысты алдағы онжылдықта жаһандық әскери қақтығыстың басталатыны туралы баяндамасын жариялады.

Бұл туралы Orda.kz РИА Новостиге сілтеме жасап хабарлайды.

Баяндама авторларының айтуынша, 2040 жылдан кейін әлемде «климаттық қақтығыстар» басталады, көптеген елдер геоинженерлік технологияларды пайдаланып, құрғақшылық пен су тасқыны сияқты табиғи апаттарды күшейтеді.

– Климаттың өзгеруінің физикалық салдарының күшеюі трансшекаралық геосаяси нүктелерді ушықтыруы мүмкін, өйткені мемлекеттер өз мүдделерін қорғау үшін қадам жасайды, - делінген құжатта.

Дәл осы сипаттағы жаһандық өзгерісте Қытай мен Үндістан маңызды рөл атқаратыны айтылған.

– Көптеген елдер экономикалық таңдауларға тап болады және шығарындыларды тез арада азайту үшін технологиялық жетістіктерге сүйенуі мүмкін. Қытай мен Үндістан температураның көтерілу траекториясын анықтауда маңызды рөл атқарады, - делінген құжатта.

Сонымен қатар, баяндама авторлары климаттың өзгеруі әсерінен дамушы елдерде ішкі қақтығыстардың туындау қаупін айтты.

Климаттық соғыстың ықтимал нүктелеріне Конго, Инд, Меконг және Ніл өзендері сияқты аймақтар жатады. Ондағы қақтығыстар өзен арналарының өзгеруіне және су ағындарының қайта бағытталуына байланысты туындауы мүмкін.

Климаттың жаһандық өзгеруінің теріс әсерінен ең көп зардап шегетін 11 мемлекет көрсетілген. Сарапшылардың пікірінше, бұл мемлекеттерде өмір сүру қиындауы мүмкін. Атап айтқанда, ядролық қаруы бар Қытай, Үндістан мен Пәкістан, сондай-ақ Ауғанстан, Солтүстік Корея, Мьянма және Орталық және Оңтүстік Америкадағы бірқатар елдер.