«Қалаулым» қашан жабылады? – Аида Балаева жауап берді

Ақпарат және қоғамдық даму министрі Аида Балаева есеп беру кездесуінде жоғары рейтинг беріп отырған бағдарламалар жайлы айтты.

Бұл туралы Orda.kz хабарлады.

Министрдің айтуынша, халық сұранысы бар кезде бағдарламалар жабылмайды.

– Бұл - жауыр болған мәселелердің бірі. Дегенмен біздің ақпарат министрлігінің кез келген бағдарламаны жауып тастауға құқығы жоқ. Арнайы заң бар. Бұл бағдарламалар жекеменшік БАҚ құралдарында таралып жатыр. Қоғам тарапынан наразылық болғаннан кейін, біз ол бағдарламаларды өндірушілерге өз ұсыныстарымызды айттық. Бірақ ол бағдарламалардың рейтингі жоғары. Қоғамның бір бөлігі наразылық білдірсе, екінші бөлігі өліп-тіріліп сол бағдарламаларды қарайды, - деді министр. 

«Qos Like», «Қалаулым», «Астарлы ақиқат» сынды бағдарламаларды жабу үшін халықтың мәдениеті мен талғамын көтеру керек.

– «Астарлы ақиқат», «Қалаулым» бағдарламалары еліміздегі рейтингі жағынан ең жоғарғы бағдарламалар болып отыр. Бұл халықтың сұранысы жоғары екенін байқатады. Халық көріп отырғаннан кейін БАҚ иесі бағдарламаны жаппайды. Сондықтан министрлік пен БАҚ халықтың мәдениеті мен талғамын көтеру мәселесін дұрыс жолға бағыттауы керек. Сонда ғана мұндай бағдарламаларды жабуға мүмкіндік аламыз, - деді Аида Балаева.