Алакөл жағасынан күніне 10 тоннадан астам қоқыс шығарылады

Абай облысының әкімдігі жергілікті туризм ерекшеліктеріне тоқталды.

Күн сайын Алакөл жағажайларынан 10 тоннадан астам тұрмыстық қалдық шығарылады, деп жазады «Репортер». Облыстың коммуналдық қызмет мамандары жағалау сызығының төрт шақырымға жуық бөлігінде қызмет көрсетеді. 30 жұмысшы күніне үш рет айналып, демалыс аймағының Арбаттағы, жағалаудағы, жаяу жүргіншілер жолы мен жол жиектеріндегі қоқыстарды шығарумен айналысады.

«Абай облысы жағындағы Алакөл жағасында күніне 15-20 мың адам демалады. Өткен жылы бүкіл туристік маусымда көлге 1 миллионнан астам адам келген. Ал биыл еліміздің демалушылары мен алыс-жақын шетелдерден келетін қонақтардың саны болжам бойынша былтырғы көрсеткіштен асып түседі»  деп хабарлады әкімдік.

Биылғы маусымда 1,5 миллионнан астам турист болады деп күтілуде. Бұл өткен жазғы көрсеткіштен 50 пайызға артық. 300-ге жуық демалыс орны адамдарды қабылдайды. Шетелден келетін турист ағыны өте көп.

Бұл ретте демалушылар көбіне өңірдегі жолдардың сапасына шағымданады. Дегенмен, демалушылар үшін пойыз немесе ұшақ қатынастары да бар. Күн сайын Алакөлге тоғыз жолаушылар пойызы келеді, Алматы мен Астанадан да әуе рейстері үзіліссіз қатынайды.