«Алақан майлау»: Ақтөбеде 300 мың теңге пара сұраған бөлім басшысы 9 млн теңге айыппұл арқалады

Ақтөбе облысында Ырғыз аудандық жер қатынастары бөлімінің басшысы Медет Бердалин пара алғаны үшін кінәлі деп танылды, деп хабарлайды Orda.kz.

Мемлекеттік қызметкерге Қылмыстық кодекстің 366-бабының 2-бөлігі («Пара алу») бойынша айып тағылған. Тергеу дерегінше, Бердалин аудан тұрғынынан жер телімін жалға алу мәселесін оң шешіп беру үшін 300 мың теңге көлемінде пара талап еткен.

Сот анықтағандай, тұрғын Нұра ауылдық округі аумағынан шөп шабуға арналған жерді 1 ай мерзімге жалға алмақ болған. Бердалин оны кабинеттен шығарып сөйлесіп, кейін қалаға шақырып, мәселені шешу үшін ақша сұраған. Азамат бұл туралы ҰҚК-ге хабар берген.

2025 жылғы қыркүйекте күдікті аудан тұрғынын өзінің жұбайының атына тіркелген Kaspi Gold шотына екі бөлікпен — 200 және 100 мың теңге — аударуға көндірген. Ақшаны әйелі үй қажеттілігіне жұмсаған.

Ырғыз аудандық соты Бердалинді кінәлі деп танып, оған 9 млн теңге айыппұл (параның 30 еселенген мөлшері) салу туралы үкім шығарды. Сондай-ақ ол мемлекеттік және квазимемлекеттік секторда өмір бойы қызмет ету құқығынан айырылды.

Бердалин өз кінәсін толық мойындап, жасаған ісіне өкініш білдірді. Сот залынан босатылды.

Автор: Ардақ Ерубаева