Алакөлде туристер мен тұрғындар арасында төбелес болды

Алакөл көлінің жағасындағы Ақши ауылындағы дәмханалардың бірінде туристер мен жергілікті тұрғындар арасында жаппай төбелес орын алды.

Бұл туралы Orda.kz хабарлады.

Желідегі видеода жергілікті тұрғындар демалып жатқан туристермен сөзге келісіп қалғанын көруге болады.

 – Біз Алакөлдегі Ақшиденбіз. Жергілікті жабайылар үнемі туристерге шабуыл жасайды. Ал билік үндемейді. Олар таныстары арқылы бәрін шешіп кетеді, - дейді видео авторы.

Алматы облысы полиция департаментінің баспасөз қызметінің айтуынша, Алакөл ауданы Ақши ауылында 15 тамыздан 16 тамызға қараған түні жастар арасында төбелес орын алған.

– Анықталған инцидент бойынша Алакөл АПБ оқиға орнына барлық мән-жайларды анықтау үшін учаскелік полиция инспекторымен жедел-тергеу тобы жіберілді. Тәртіп сақшылары келгеннен кейін кафе қызметкерлері өтініш жазды, осылайша фактіні растады. Қазіргі уақытта жанжалға қатысушылардың барлығын анықтау бойынша жедел-іздестіру жұмыстары жүргізілуде. Аталған факті бойынша ҚР Қылмыстық кодексінің 293-бабымен іс қозғалды. Тергеу барысы туралы қосымша хабарланатын болады. Айта кетейік, топтық төбелес кезінде куәгерлер немесе зардап шеккендер полицияға жүгінбеген, - делінген полиция хабарламасында.