Алаяқтар қасиетті сапарға да қол сұғып, 17 қажының ақшасын қалтаға басқан

Елордада азаматтардың діни сенімдерін пайдаланған ер адам сотталды. Ол өзін қажылық сапарды ұйымдастырушы ретінде көрсетіп, жалған әуе билеттері мен қонақ үйлер уәде еткен, деп хабарлайды  Orda.kz.      

Алаяқтың құрбаны еліміздің әр өңірінен 17 адам болған, олардың арасында қарт ата-аналарын умраға жіберуді жоспарлаған отбасылар да бар. Олар жалпы 7,4 млн теңгеден астам қаражатынан айырылған. Бұл туралы еліміздің Бас прокуратурасы мәлімдеді.

Сотталушы ірі көлемдегі алаяқтық жасағанын мойындап, жәбірленушілерге келтірілген залалды өтеді.

Сот үкімімен оған 3 жыл мерзімге бас бостандығын шектеу жазасы тағайындалып, пробациялық бақылау белгіленді.

Прокуратура қажылыққа қатысты қызметтерді тек лицензиясы бар туристік агенттіктерден алу қажет екенін ескертті. Ақшаны тексерілмеген тұлғаларға, тіпті өздерін қажылық ұйымдастырушысы ретінде таныстырған адамдарға аударғандар алаяқтарға тап болуы мүмкін.

Тақырыпқа қатысты ұсынамыз:

• Қажылыққа барарда сенімді туристік фирманы қалай таңдауға болады
• Биыл миллионға жуық мұсылман қажылық парызын өтеді
• Меккеде 577 қажы қаза тапты