Алаяқтар бір аптада 32 млн теңге табыс тапты

Ақмола облысының 21 тұрғыны бір апта ішінде алаяқтарға алданып, 32 млн теңгеден айырылды.

Бұл туралы Ақмола облысының прокуратурасы хабарлады.

«Облысымыздың азаматтары осы аптада алаяқтарға сеніп, 32
миллион теңгеге алданды. Алаяқтар қазірдің өзінде жәбірленушілерге қоңырау шалып, өздерін ұялы байланыс операторы, банк
қызметкері ретінде таныстырып жатыр. Сонымен қатар, жәбірленушілердің атынан достарына, таныстарына қарызға ақша сұрап хабарлама жіберуде» деп хабарлады Ақмола облыстық прокуратурасы.

Прокуратураның айтуынша, Қосшы қаласының тұрғыны 200 мың теңгені «What's App» мессенджеріне жазған алаяққа аударған. Ол өз танысы ақшаны пайызбен қайтарады деп сеніп, алаяқ көрсеткен шотқа аударып жіберді. Алайда кешке танысына қоңырау шалып, оның мүлде ақша сұрамағанын естиді.

Сондай-ақ, облыстық прокуратура таныстар мен туыстарыңыз ақша сұрап хат жолдаса, міндетті түрде дәл сол адам хабарласқанына көз жеткізуге кеңес береді.