«Alageum Electric» компаниялар тобы БҚО-ға көмек ретінде 1 млрд теңге бөледі

«Alageum Electric» компаниялар тобы БҚО-ға көмек ретінде 1 млрд теңге жібермекші, деп хабарлайды Orda.kz порталы.

Сайдулла Қожабаевтың атынан Alageum Electric компаниялар тобының басшылығы мен директорлар кеңесі су тасқынының қиын жағдайын ескеріп, зардап шеккен қазақстандықтарға үйлерін қалпына келтіруге көмектесу үшін қосымша 1 миллиард теңге бөлу туралы шешім қабылдады.

Бұл қаржы Батыс Қазақстан облысында тұрғын үй салып, инфрақұрылымды қалпына келтіруге жұмсалады. Бұған дейін Alageum Electric компаниялар тобының кәсіпорындары ірі су тасқынынан зардап шеккен аймақтарға көмек көрсетуге 102 млн теңге, оның ішінде қаланы электр тоғымен жабдықтауды толық қалпына келтіру үшін PETZ зауытының трансформатор түріндегі жаңа жабдықтарын Петропавлға жіберген болатын.

Сондай-ақ барлық қолдаулар құрал-жабдықтармен қамтамасыз етіліп, қызметкерлердің ерікті көмегі де көрсетілді.

«Көптеген отандастарымыз баспанасыз қалды, біз бейжай қарай алмаймыз. 342 қызметкеріміз Батыс Қазақстаннан. Оларды отбасымен санағанда 600-ден астам адам. Біз аумақтарды қалпына келтіруге көмектесу үшін жан-жақты қолдау көрсетуге дайынбыз», - деді «Alageum Electric» компаниялар тобы директорлар кеңесінің төрағасы Еркебұлан Ілиясов. 

Alageum Electric – отандық электротехника холдингі. Топ электр, электротехника және құрылыс салаларында табысты жұмыс істейтін 14-тен астам ірі кәсіпорынды біріктіреді, оның ішінде Кентау трансформатор зауыты, Азия Трафо, Орал трансформатор зауыты, Петропавл электротехникалық зауыты, «Элетромонтаж» АҚ және т.б. бар. Компания өнімдері отандық, ішкі нарықта сатылатын және ТМД және Таяу Шығыс елдеріне экспортталатын халықаралық сапа стандарттарына сәйкес келеді.