Алғаш рет горилладан коронавирус табылды

Американың Сан-Диего қаласындағы хайуанаттар бағында горилланың коронавирус жұқтыруы туралы әлемдегі алғашқы жағдайы анықталды. Бұл туралы РИА Новости хабарлайды.

«Сан-Диегодағы Сафари паркіндегі горилла тобы мүшелерінде COVID-19 қоздырғышында SARS-CoV-2 вирусы анықталды. Сәрсенбі, 6 қаңтарда екі горилла жөтеле бастады. 11 қаңтарда, дүйсенбіде АҚШ Ауыл шаруашылығы министрлігінің Ұлттық ветеринарлық қызмет зертханалары сынақтың оң нәтижелерін растады», - делінген сафари паркінің сайтындағы хабарламада.

Болжам бойынша, жануарлар коронавирусты симптомсыз ауырған қызметкерден жұқтыруы мүмкін.

Бұрын бұл аурудың күзендер арасында кең тарағаны туралы хабарланған. Өткен жылы Барселонаның хайуанаттар бағында арыстандар коронавируспен ауырғаны белгілі болды, дәл солай АҚШ-та қар барысы да ауру жұқтырып үлгерген.

ДДҰ сарапшылары бұған дейін иттер мен мысықтардың коронавирус жұқтыруы мүмкін екенін растаған, бірақ мұндай жағдайлар сирек кездеседі.