Ақжарқын Тұрлыбай Қытайдан елге қайтарылуы мүмкін

Қытайда өмір бойына сотталған Ақжарқын Тұрлыбайдың ісі Бас прокуратура мен сыртқы істер министрлігінің бақылауында. Бұл туралы Бас прокурордың орынбасары Ғалымжан Қойгелдиев мәлімдеме жасады, деп хабарлайды Orda.kz.

«Ақжарқын Тұрлыбайға қатысты сыртқы істер министрлігімен бірлесе отырып, Қытайдан қайтаруға бар күшімізді салып жатырмыз. Біз ол жұмысты тоқтатқан жоқпыз. Қазіргі таңда, жұмыс белсенді түрде атқарылып жатыр. Менің ойымша, жақын арада оң шешімі табылып қалар. Не дегенімен, бұл оңай процесс емес. Тұрлыбайдың жазасын елімізге келіп өтеуге қатысты арызы бізге түскен болатын. Ол жазасын елімізге келіп өтегісі келеді. Ақжарқын Тұрлыбай өзінің қорғаушысымен тұрақты түрде байланыста», — деді Ғалымжан Қойгелдиев.

Еске сала кетейік, Ақжарқын Тұрлыбай 2014 жылы Гуанчжоу әуежайынан есірткі алып өтпек болды деп айыпталып,  Қытай соты оны өмір бойына бас бостандығынан айырған.