Ақтөбенің Атөткел жерінде балық қырылды

Ақтөбе облысы Ырғыз ауданының Атөткел жерінде балық қырылды. Өңірде тасқыннан кейін сайға жиналған суларда балықтар бірінші рет қырылып жатқан жоқ, деп хабарлайды Orda.kz.

Атөткелдегі сайда балық өліп жатқаны туралы бейнежазба әлеуметтік желіде тарады. Тұрғындар көлдің бетіне қалқып шығып жатқан балықты көрсетті. Ырғыз ауданы әкімдігі ақпаратты растап, Нұра және Белшер ауылдары тұсындағы Атөткел жеріне инспекторларды жіберген. Алдағы күндері қырылу себебін анықтау және оларды жою жұмыстары жүргізіледі.

«Қазіргі уақытта «Ырғыз-Торғай» мемлекеттік табиғи резерватының инспекторлары және «Тобыл-Торғай облысаралық бассейндік балық шаруашылығы инспекциясы» инспекторымен бірге мән-жайды анықтау және оның салдарын жою бойынша тиісті шаралар қабылданып жатыр. Мәселе бойынша аралық ақпарат 04.04.2025 жылы мәлім болады», деп хабарлайды Ырғыз ауданының әкімдігі. 

Әкімдіктің мәліметінше, балық қырылған су айдыны ресми түрде тіркелген көл емес. Айтуларынша, бұл көктемгі су тасқыны кезінде пайда болған көл.

Естеріңізге салсақ, ақпан айында Ырғыз ауданының Қойбағар көлінде де балық қырылу оқиғасы болды. Инспекторлар өзектен 70 келі өлі балықты шығарды. Жергілікті әкімдік бұл көлді де 2024 жылы болған тасқыннан кейін пайда болған су айдыны деп түсіндірген еді.

Автор: Ардақ Ерубаева