Ақтөбедегі саябақ мемлекетке қайтарылды

Ақтөбе орталық саябағындағы 1,4 гектар жер мемлекетке қатарылды, деп хабарлайды Orda.kz.

Ауыл шаруашылығы министрлігінің ақпаратына сүйенсек, Ақтөбеде Орталық саябағындағы жер учаскесін заңсыз беру фактісі анықталды.

Бұл факт облыстық жер ресурстарын басқару департаменті жүргізген тексеру кезінде анықталды. Белгілі болғандай, ауданы 1,4 га учаске жеке кәсіпкерге берілді.

Прокурорлық қадағалау актісі бойынша құзыретті орган сотқа учаскені мемлекетке қайтару туралы талап арыз берді. Сот талапты қанағаттандырды.

«Бұл жер учаскесін қайтару қалалық саябақтың жасыл аймағын сақтауға, сондай – ақ қала тұрғындары үшін ортақ пайдаланылатын жер учаскелеріне қолжетімділікті қамтамасыз етуге мүмкіндік береді»,  деп атап өтті ведомство.

Еске салсақ, Солтүстік Қазақстан облысында 25 мың гектардан астам жер мемлекет меншігіне қайтарылды. Ауыл шаруашылығы учаскелері өз мақсатына сай пайдаланылмаған.