Ақтөбедегі Президент атындағы саябақты полиция күзетіп жүр

«Митинг болады» деп алдын-ала болжамды белгіленген Ақтөбедегі Президент атындағы саябақта қауіпсіздік шаралары күшейтілген. 

Бүгін Ақтөбедегі жағдай тыныш. «Митинг болады» деп белгіленген Президент атындағы саябақты полиция күзетіп тұр. Олардың саны шамамен жиырмаға жуық. Формадағы қызметкерлерді саябақтың әр жерінде қос-қостан жүргенін көруге болады. 

Сонымен бірге азаматтық киімде жүрген кейбір адамдар да күдік туғызды. Олар жылыну үшін саябақты сыпырып жүргендердің құралын сұрап, көмектескен болды. 

Полиция күзеткен аумақта екі автобустың тұрғанын байқадық. Оның бірі саябақтың қарсы бетіндегі Нұр-Ғасыр мешітінің жанына қойылған. Екіншісі саябақ артында тұр. Болжамды аумақ та, облыс әкімдігінің алды да қоршалмаған. 

Бір байқағанымыз, демалысқа қарамастан саябақ жанындағы ойын-сауық орталығында адам аз. Әдетте мереке күндері келушілері көп болатын орын бүгін тыныш.

Айта кетейік, бүгін таңертең сағат 10:00 шамасында Республика күніне орай Ақтөбедегі Президент атындағы саябақта Ту көтеру рәсімі өтті. Салтанатты шараға облыстық және қалалық мәслихат депутаттары, құқыққорғау және мемлекеттік органдардың басшылары қатысты.

Ақтөбе. Ардақ Ерубаева