Ақтөбеде ыстық құдыққа құлап күйіп қалған әйел қайтыс болды

Ақтөбеде әйел ыстық су толған ашық тұрған құдыққа түсіп кетіп, ауруханада қайтыс болды. Полиция істі тек оның өлімінен кейін ғана қозғады, деп хабарлайды Orda.kz.

«Diapazon»  мәліметінше қайғылы оқиға 18 шілдеде «Ақтөбе Ажары» ауданында Әбілқайыр хан даңғылында, 25 қабатты «Ақтөбе Ажары» тұрғын кешенінің маңында болған. Қала тұрғыны құдыққа құлап, ыстық суға күйіп қалған, ол 11 күннен кейін ауруханада қайтыс болды.

Полиция қылмыстық істі тек әйелдің қазасынан кейін қозғаған. Алайда біраз уақыттан соң іс белгісіз себептермен тоқтатылған. Марқұмның туыстары мұндай шешімге наразы. Себебі сол күні бұл аумақта жөндеу жұмыстары жүріп жатқан, бірақ ешқандай қоршау немесе ескерту жалауы болмапты. Туыстарының айтуынша, сол сәтте полиция бейнежазбаларды бірден тексергенде, жағдайды анықтау әлдеқайда оңай болатын еді.

Іске адвокат Дәурен Алданиязов араласқаннан кейін қалалық прокуратура істі тоқтату туралы шешімді жойып, тергеуді қайта бастапты.

Ал полиция департаменті қылмыстық істі тергеп жатыр деп айтты.

«Полиция департаменті қауіпсіздік талаптарына сай келмейтін жұмыстарды орындау фактісі бойынша қылмыстық істі тергеп жатыр. Қазір барлық мән-жай анықталуда. Тергеу барысында бейнебақылау камераларындағы жазбалар зерттеліп, куәгерлерден жауап алынып жатыр. Тергеу аяқталған соң заң аясында шешім қабылданады»,  деп хабарлады департаменттің баспасөз қызметі.

Айта кетейік, қаржы нарығын реттеу және дамыту агенттігінің басшысы Мадина Әбілқасымова Kaspi іске қосқан алақанмен төлеудің жаңа технологиясы әлі қауіпсіздік тексерісінен өтпегенін айтты.