Ақтөбеде тоқ соққан оқушы жансақтау бөлімінде жатыр

Ақтөбе облысының Шалқар ауданында 10 жастағы бала скверде ойнап жүріп, тоқ соғып ауыр жарақат алды. Жасөспірім санавиациямен Ақтөбе қаласына жеткізіліп, облыстық балалар ауруханасының жансақтау бөліміне жатқызылды, деп хабарлайды Orda.kz.

Оқиға 19 маусым күні Шалқар қаласындағы Ідіріс Үргенішбаев көшесінде болған. Оқушы сквердегі жарық шамының үстіне шыққан кезде тоқ соққан.

Шалқар ауданының әкімі Жанболат Жидеханов оқиғаның мән-жайын түсіндірді.

«Бала ойнап жүріп, жарық шамының үстіне шыққан. Бұл сквер 9 мамыр қарсаңында ғана салынған болатын. Көмек дер кезінде көрсетілді. Бүгін таңертең санавиациямен Ақтөбе қаласына жеткізілді», – деді әкім.

Дәрігерлердің айтуынша, оқушы термиялық күйікке шалдыққан. Қазіргі уақытта жағдайы ауыр. Облыстық денсаулық сақтау басқармасы ресми мәлімет берді.

Құқық қорғау органдары оқиғаның мән-жайын анықтап жатыр.

«Шалқар аудандық полиция бөлімі ҚР ҚК 306-бабы — «Қызмет көрсету талаптарына сай болмау» бабы бойынша сотқа дейінгі тергеу амалдарын бастады. Бала медициналық мекемеде. Қазір оқиға себептері мен жауапты тұлғалар анықталуда» , деп хабарлады облыстық полиция департаменті.

Автор: Ардақ Ерубаева