Ақтөбеде полиция ғимаратында есірткі сақтаған және сатқан полицей сотталды

Ақтөбеде полиция ғимаратында есірткі сақтағаны және қызмет орнының маңында сатқаны үшін полицей сотталды, деп хабарлайды Orda.kz «Диапазон» басылымына сілтеме жасап.

«Жаңа жылға бірнеше күн қалғанда қазылар алқасы Заманбек Шәкібаевты мефедрон сақтау және сату бойынша кінәлі деп тауып, 10 жылға бас бостандығынан айырды. Сондай-ақ, сот үкімі бойынша ол полиция сержанты шенінен айырылады. Полицей 2022 жылдың мамырынан бері қамауда отыр. Үкім әлі заңды күшіне енген жоқ» деп жазылған хабарламада.

Айыптау қорытындысынан анықталғандай, айыпталушы мефедронды 11 пакетке салып, өз кабинетінде сақтаған. Мәліметтерге сәйкес, ол 2022 жылдың сәуір айында өзі жұмыс істейтін №2 полиция бөлімі ғимаратының алдында есірткіні 120 мың теңгеге сатқан.

Бұл іс сонау 2023 жылы Ақтөбедегі сотта қаралып, кейін полицей 10 жылға бас бостандығынан айырылған. Сотталғанның кінәсін мойындамағаны атап өтілді.

Мәліметтерге сәйкес, іс Жоғарғы сотқа жетіп, онда бірінші сатыдағы сот үкімі мен облыстық соттың сот алқасының қаулысы жойылып, іс жаңадан сот талқылауына жіберілді. Есірткі сатты деп айыпталған полиция қызметкерінің ісін алқабилер екінші рет қарағаны хабарланды.