Ақтөбеде мүгедек болып қалған қызметкер сотта жеңіске жетті

Ақтөбеде шахтадағы төтенше жағдайға AltaiMiningGroup ЖШС 80% кінәлі деп танылды.

Бұл туралы Ақтөбе қалалық сотының баспасөз қызметі хабарлады.

«Ақтөбе қаласының сотына қызметкер жұмыс берушіден келтірілген моральдық залалды өтеу үшін 5 миллион теңге өндіру туралы арызбен жүгінді. Іс материалдарынан анықталғандай, арызданушы 2022 жылдан бері шахтада бригадир болып жұмыс істеген. Ауысымда жұмыс істеп жатқан кезде оның үстіне тас құлап, есінен танып қалған. Жазатайым оқиға салдарынан қызметкер ауыр жарақат алып, ота жасалып, ІІІ топтағы мүгедектік тағайындалды. Өндіріске байланысты жазатайым оқиға туралы актіде жұмыс берушінің кінәсі 80% және талапкердің еңбекке қабілеттілігін 50% жоғалтқаны белгіленді» деп хабарлады Ақтөбе қалалық сотының баспасөз қызметі.

Сот арызданушының денсаулығына келтірілген залалды назарға алып, алған жарақатының ауырлығын, жоғалған денсаулығын қалпына келтіру бойынша алдағы операциялық және оңалту курстарын ескере отырып, зардап шегушінің  талабын толығымен қолдады.

«Арызданушының пайдасына жұмыс берушіден 5 миллион теңге көлемінде моральдық шығын өндірілді» деп толықтырды сот.

Аталған жұмыс беруші компания «AltaiMiningGroup» ЖШС.