Ақтөбеде мектеп оқушысы жүрек талмасынан қайтыс болды

Ақтөбеде 9-сынып оқушысы кеше кешкісін дене қызуы көтеріліп, ауруханаға жеткізілді. Кейін оның жүрек талмасынан көз жұмғаны белгілі болды. 15 жастағы жасөспірім бұған дейін денсаулығына байланысты еш жерде тіркеуде болмаған, деп хабарлайды Orda.kz.

Оқиға 27 мамыр күні сағат 19:30 шамасында Ақтөбе облысы Мұғалжар ауданының Ембі қаласында тіркелген. 2010 жылы туған жасөспірім нағашы ата-әжесінің қолында тұрған.

Ауыл тұрғындарының айтуынша, оқушы «Горилла» энергетикалық сусынын ішкен болуы мүмкін. Алайда бұл болжамды ресми органдар растаған жоқ. Аудандық білім бөлімі жасөспірімнің денсаулығына байланысты ешқандай есепте тұрмағанын хабарлады.

«9-сынып оқушысы нағашы ата-әжесімен бірге тұрған. Анасы тұрмыста. Денсаулығына байланысты еш жерде есепте болмаған. Кешке дене қызуы көтеріліп, ауруханаға жеткізілді. Кейін жүрек талмасынан қайтыс болды», – деді Мұғалжар аудандық білім бөлімінің басшысы Бақраман Аманжол.

Жасөспірім аудандық ауруханаға жеткізілгеннен кейін үш сағаттан соң қайтыс болды.

«15 жастағы науқас 27 мамыр күні сағат 19:30 шамасында Ембі аудандық ауруханасының жұқпалы аурулар бөліміне түсті. Дене қызуының көтерілгеніне, құсу мен іш өтуге шағымданған. Сағат 22:00-де жағдайының нашарлауына байланысты санитарлық авиация арқылы облыстық көпсалалы балалар ауруханасының мамандарынан кеңес алынды. Көрсетілген емге қарамастан науқас көз жұмды. Өлімнен кейінгі диагноз – менингит», – деп хабарлады Ақтөбе облыстық денсаулық сақтау басқармасы.

Облыстық полиция департаменті нақты себебін анықтау үшін сот-медициналық сараптама тағайындалғанын мәлімдеді.

Еске салсақ, Қазақстанда мәжбүрлі некеге және алып қашуға қатысты жаза күшейтілді.

Автор: Ардақ Ерубаева