Ақтөбеде көпқабатты үйдің балконынан студенттің денесі табылды

Ақтөбедегі Жұбанов университетінде білім алып жүрген 1 курс студентінің денесі табылды.

20 жастағы бозбаланың не үшін өлімге барғаны белгісіз. 

Оқиға 25 қараша күні болған. Студенттің денесі қаладағы пәтерлердің бірінен табылды. Марқұм Жұбанов университетінің жаратылыстану факультетіне биыл түскен. Мәртөк ауданының тумасы. Марқұм тұрған жатақхананың алдында сауалнама жасадық. Қайғылы хабарды студенттердің бірі естіген, екіншісі бейхабар. Жатақхана коменданты студенттердің демалыс күндері үйлеріне баратынын айтып, оқиғаға пікір білдіруден бас тартты.

Ал оқу орны марқұм студенттің оқу үлгерімі өте жақсы деген мінездеме береді.

“Қаладағы көп қабатты үйлердің бірінде университет студентінің бірі өзіне қол жұмсағаны белгілі болды. Бұл - университет ұжымы үшін үлкен қайғы. Жақындары мен отбасына қайғырып көңіл айтамыз. Қазір оқиға бойынша полиция департаменті тергеу жүргізіп жатыр. Университет тергеуге толық көмек көрсетеді. Ол белсенді студенттердің бірі болды, сабақта озат, құрдастарына сыйлы болатын.  Оқуы мен тәртібіне қатысты шағым болған емес. Бірінші семестр бойынша сабақтарын үздік аяқтап, қорытынды экзамендерге жолдама алған. Біз өз тарапымыздан барынша қолдау көрсетуге дайынбыз”,- деді Жұбанов университетінің баспасөз қызметінен Әсел Бақберген.

Полиция департаменті оқиғаға қатысты тергеу жүріп жатқанын хабарлайды.

“25 қараша күні Жұбанов көшесіндегі көпқабатты үйдің 9 - қабатының балконында қабатта адамның асылып тұрғаны туралы хабарлама түсті. 20 жастағы жігіт Мәртөк ауданының тумасы. Қалтасынан ұялы телефоны, құжаты болған.  Хат табылмады. Жас жігіттің өз-өзіне қол жұмсағаны анықталды. Себептері анықталуда”,- деді облыстық ПД-нің баспасөз қызметі.