Ақтөбеде 39 мұғалім жалған сертификатпен үстемақы алып отырған

Ақтөбе облысы бойынша ішкі мемлекеттік аудит департаменті мұғалімдердің өтірігін әшкереледі. Темір ауданында 39 мұғалім жалған сертификат тапсырып, мемлекеттен артық ақша алып отырған, деп хабарлайды Orda.kz.

Аудиттік тексеріс кезінде Темір ауданының білім бөлімі жалпы сомасы 86 млн теңгені талан-тараж қылғаны анықталды.

«Мұғалімдер алған сертификат жүйеде расталмады. Нәтижесінде 86 млн теңгеден аса үстемақы заңсыз төленіп келген. Аудиттік тексеріс барысында оның 15,6 млн теңгесі бюджетке қайтарылды», – деді Ақтөбе облысы бойынша ішкі мемлекеттік аудит департаментінің басшысы Сәкен Қасымов. 

Темір аудандық білім бөліміне жасалған аудит тексерісі кезінде іссапар шығындарының да  артық есептелгені белгілі болды. Сонымен қатар, 2023 жылғы есеп бойынша 314 мың теңге сыйақы артық төленген.  Оның ішінде «Еркем-ай» балабақшасы 63,7 мың теңге, «Балдырған» балабақшасы 124,3 мың теңге, «Айгөлек» балабакшасы 126,4 мың тенгені артық алған.

Аудит департаменті ұсынған мәліметке сүйенсек, қазіргі күні  46,8  млн теңге бюджетке  қайтарылды.
Қалған ақша сот процесі барысында түгенделеді.

Жіберілген кемшіліктерге қатысты 17 жауапты қызметкер әкімшілік жауапқа тартылды, айыппұл төледі.
Ақтөбе облысының білім басқармасы мұғалімдердің біліктілік санатын алу үшін тапсырған сертификаттары жалған болғанын растады.

«Қазіргі таңда осы 39 педагогтің 20-сы бюджетке артық төленген қаражатты кері қайтарды. Қалған 19 педагогке қаражатты қайтару бойынша түсіндіру жұмыстары жүргізілуде», деп мәлімдеді Ақтөбе облысының білім басқармасы.

Автор: Ардақ Ерубаева