Ақтөбеде 16 жастағы баланың денесі үш күннен бері табылмай жатыр

Ақтөбе облысының Ырғыз ауданында суға батып кеткен жасөспірімді іздестіру жұмыстары үшін су асты дроны іске қосылды, деп хабарлайды Orda.kz.

Қайғылы оқиға 5 маусым күні Мамыр ауылында болды. Жасөспірім көктемгі су тасқынынан кейін жиналған суға батып кеткені туралы хабар сағат 16:10 шамасында түскен.

Оқиға орнына құтқарушылар мен техника дереу жіберілді. Іздестіру жұмыстарына жалпы 42 адам тартылған. Олардың қатарында ТЖД-дан 12 маман, оның ішінде 7 адам – жедел-құтқару жасағынан, 5 адам – Ырғыз аудандық ТЖБ-дан, сондай-ақ ЖАО-дан 5 қызметкер, 5 полиция қызметкері және 20 ерікті бар. Іздеуге су асты дронын да қосқан.

Ақтөбе облыстық ТЖД іздеу барысын растады. Ведомствоның мәліметінше, күшті жел, лай су және өзен ағысы жұмысты қиындатып отыр.

«Құтқару бөлімінен 5 адам, 1 техника, 20 ерікті тартылды. Қазір сүңгуірлер жұмыс істеп  жатыр»,  деп хабарлады Ырғыз ауданының әкімдігі.

ТЖД тұрғындарды судағы қауіпсіздік ережелерін сақтауға шақырады. Рұқсат етілмеген жерлерде шомылуға қатаң тыйым салынады.

Ардақ Ерубаева