Ақтөбеде 14 жасында босанған оқушының әжесі жол апатынан қаза тапты

Ақтөбеде 64 жастағы өгей атасынан бала туған қыздың отбасында тағы да қайғылы жағдай болды. Оқушының әжесі қаладан ауылға қайтып келе жатып жол апатынан мерт болды, деп хабарлайды Orda.kz.

Оқиға 27 қазан күні кешкісін Қобда – Ойыл тас жолының бойында, Саралжың ауылының маңында болған. Полицияның мәліметінше, Lada Granta автокөлігінің 41 жастағы жүргізушісі рөлге ие бола алмай, көлік жол жиегіне шығып кетіп, аударылып қалған.

Салонда отырған жолаушы — Ойыл ауданының тұрғыны, 14 жасында босанған қыздың әжесі оқиға орнында көз жұмған. Ал жүргізуші түрлі жарақат алып, аудандық ауруханаға жеткізілді.

Ауыл тұрғындарының айтуынша, немересі босанып, күйеуі қамауға алынғаннан кейін әже біраз уақыт аудандық ауруханада емделіп жүрген. Кейін қызымен бірге Ақтөбеге барған, ал қайғылы жағдай ауылға қайтып келе жатқан сәтте болған. Көлікті марқұмның сіңлісі айдаған. Машинада сонымен қатар марқұмның кенже қызы мен 10 жастағы бала болған.

Ауыр жарақат алған жасөспірім марқұмның жиені екені хабарланды. Ол санитарлық авиациямен Ақтөбеге жеткізілген.

«Жол-көлік оқиғасы фактісі бойынша сотқа дейінгі тергеу басталды. «Гранта» автокөлігінің рөлінде 41 жастағы әйел болған. Ол көлікті басқара алмай, машина аударылып кеткен. Апат салдарынан 51 жастағы жолаушы қаза тапты. Үш адам жарақат алып, ауруханаға жеткізілді. Олардың арасында 9 жастағы қыз бала бар. Ол санитарлық авиация арқылы облыстық балалар ауруханасына жеткізілді. Дәрігерлер оның жағдайын ауыр деп бағалап отыр. Ал екі ересек адам түрлі жарақаттармен Ойыл аудандық орталық ауруханасында ем қабылдап жатыр», деп мәлімдеді полиция.  

Айта кетейік, 14 жастағы жас ана атанған оқушының нәрестесіне қатысты іс бойынша күдікке алынған өгей атасы  — 64 жаста. Ол қазіргі уақытта қамауда, тергеу жалғасып жатыр.