Ақтөбеде 108 киік бірін-бірі таптап өлтірді – инспекция

Ақтөбе облысы Әйтеке би ауданына қарасты Қайрақты өзенінен инспекторлар 108 киіктің өлексесін шығарды. Инспекция киіктің неден қырылуы мүмкін екенін топшылап көрді, де хабарлайды Orda.kz.

Орман шаруашылығы және жануарлар дүниесі жөніндегі аумақтық инспекциясының Ақтөбе облысы бойынша басшысы Әділкерей Әуелбаевтың айтуынша, киіктер 12-13 қыркүйек күндері қырылған болуы мүмкін. Инспекция өзенде қалқыған өлекселерді әлеуметтік желіден көрген. Кейін шұғыл шара қабылдағанын хабарлады. Желіде ауыл тұрғындары өзенде киіктердің қараусыз қырылып жатқанын көрсеткен еді. 

«Өзеннен 108 бас киіктің өлексесі шығарылды. Оның ішінде 60 басы аталық. Ветеринария мамандары сол жерге барды. Залалсыздандыру жұмыстары жүрді. Арнайы орында жойылды. Неден болған дегенге келсек, сол жерден 10 мың бас киік өткен. Қазір судың азаюына байланысты өткелдерде қамыс, екінші басы жар содан өте алмай қалған. Қазіргі болжам осындай», — деді Әуелбаев. 

Экология департаменті оқиға орнынан сынама алу жұмыстарын жүргізген. Нәтижесі қосымша хабарлайтындарын айтты.