Ақтөбе соты Асқар Ақтілеуге қатысты әкімшілік сотты тоқтатты

«Жала жабу» бабымен айыпталған журналист Асқар Ақтілеудің әкімшілік құқық бұзушылық жасамағаны туралы сот қаулысы шықты.  

15 қаңтар күні Ақтөбе қаласының әкімшілік құқық бұзушылық жөніндегі мамандандырылған ауданаралық сотының судьясы Гүлзира Ақмолдина журналистке қатысты әкімшілік істің ұйғарымын шығарды.

«Асқар Ақтілеуге қатысты ҚР ӘҚБтК-нің 73-3-бабы негізінде қозғалған іс құрамының болмауына байланысты тоқтатылсын» деді судья Гүлзира Ақмолдина.

Сот қаулысына келіспейтін тарап көшірме алған уақыттан бастап, он күн ішінде шағым түсіре алады.

Айта кетейік, ақтөбелік журналист Асқар Ақтілеуді Ырғыз ауданындағы гимназия директоры Гүлжайнар Нұрманова өзіне жала жапты деп айыптаған еді. Арызданушы тарап білім саласы қызметкерінің ар-намысы мен іскерлік беделін төмендеткенін алға тартып, қоғам белсендісіне қатысты дереу шара қолдануды, қатаң жазалауды сұраған еді.