Ақтөбе соты «Алаяқтық» бабымен айыпталған шендіні ақтады

Ақтөбе қаласының соты әкімдіктің бұрынғы аппарат басшысы Нұрсұлтан Исембайұлын кінәсіз деп таныды. Ол жер учаскесін 3 миллион теңгеге заңсыз сатты деп айыпталған еді, деп хабарлайды Orda.kz.

Сот Қылмыстық кодекстің 190-бабы 3-бөлігі 2-тармағы бойынша қаралған іске үкім шығарды. Тергеу материалдарына қарасақ, әкімдік қызметкері коммерциялық құрылысына арналған жер телімін іздеген тұрғынға көмек көрсетуге уәде берген. Бұл мәселені шешу үшін ол Нұрсұлтан Исембайұлына жүгініп, жер телімін алу туралы өтініш білдірген.

Тергеу деректеріне қарасақ, экс-шенеунік бұл қызметі үшін 3 миллион теңге сұраған. Ақша оған қызметтік кабинетінде табысталған.

Алайда сотталушы өзіне тағылған айыптарды мойындаған жоқ және соттан өзін ақтауды сұрады. Мемлекеттік айыптаушы оны «Алаяқтық» бабымен кінәлі деп танып, 5 жыл бас бостандығынан айыруды сұрады.

Бірақ сот Нұрсұлтан Исембайұлын кінәсіз деп танып, қылмыс жасағаны дәлелденбегендіктен ақтады. Енді ол өзіне заңсыз айып тағылғаны үшін өтемақы талап ете алады.

Сот Қылмыстық-процестік кодекстің 394-бабы 4-бөлігіне сәйкес, қылмыстық іске қатысы болуы мүмкін өзге тұлғаларды анықтау қажеттігін айтып, істі прокурорға жіберу туралы шешім қабылдады.

Автор: Ардақ Ерубаева