Ақтөбе полициясына мас күйінде көлік айдаған депутатты сотқа күштеп әкелу міндеттелді

Әкімшілік сот ұйғарымы бойынша мас күйінде «Lexus» көлігін айдаған ақтөбелік депутатты сотқа  күштеп әкелу полицияға жүктелді.   

«Аманат» партиясының мүшесі Сәния Мұратоваға қатысты дау депутаттық мандатты тапсырумен ғана шектелмейді. 

5 қыркүйек күні жол ережесін бұзып, Әкімшілік Кодекстің екі бірдей бабымен жауапқа тартылған депутатқа қатысты сот шешімі әлі шыққан жоқ. 

Сот кабинетінен Сәния Мұратоваға қатысты алғашқы сот отырысы онлайн түрде  WhatsApp қосымшасы арқылы 2023 жылдың 21 қыркүйегі сағат 11:50 уақытына тағайындалғаны белгілі болды. Депутат бұл сот отырысына қосылмаған, себебін түсіндірмеген және кейiнге қалдыру туралы өтiнiш те жазбаған. 

Ақтөбе қаласының әкімшілік құқық бұзушылық жөніндегі мамандандырылған ауданаралық сотының екі бірдей судьясы екі әкімшілік баппен жауапқа тартылған Сәния Мұратоваға қатысты істі қарайды. 

«Сотқа 12 қыркүйек күні ҚР ӘҚБтК-нің 596-бабы бойынша және 20 қыркүйекте ӘҚБтК-нің 608-бабы бойынша екі материал түскені хабарланды.  Әкімшілік құқық бұзушылық бойынша екі ісі қаралуда», - деп хабарлайды облыстық соттың баспасөз қызметі. 

Осыған дейін Ақтөбе қалалық мәслихаттың депутаты мас күйінде көлік жүргізгенін жазған болатынбыз. Депутат арада екі апта өткеннен кейін ғана мандатынан бас тарту туралы өз еркімен арыз жазды. 

Айта кетейік, Сәния Мұратова 2021 жылдан бастап Ақтөбе қалалық мәслихатының депутаты. Оған қатысты 5 қыркүйекте «Көлiк құралын жолдың жүру бөлiгiнде орналастыру, қарсы жүрiп өту немесе басып озу ережелерін бұзу»  және «Көлік құралын мас күйінде жүргізу» бойынша полиция хаттама толтырды.