Ақтөбе олимпиадалық резерв мектебінде оқушы қаза тапты

Денсаулыққа қасақана ауыр зиян келтіру фактісі бойынша сотқа дейінгі тергеу басталды.

Сәуірдің 11-і күні сағат 21.30 шамасында Есет батыр атындағы облыстық мамандандырылған олимпиадалық резерв мектеп-интернатының 8-сынып оқушысының құлап, есінен танып қалғаны туралы хабарлама келіп түсті.

Бала ауруханаға жетпей жедел жәрдем көлігінде қайтыс болды. Қазіргі уақытта баланың неліктен қайтыс болғаны анықталуда.

«Денсаулыққа қасақана ауыр зиян келтіру фактісі бойынша сотқа дейінгі тергеу басталды. Сондай-ақ, қызметтік міндеттеріне адалдық танытпағаны үшін спорт мектебінің қызметкерлеріне қатысты сотқа дейінгі тергеу амалдары жүргізілуде. Барлық қажетті сараптамалар тағайындалды» деп хабарлады полиция департаменті.