Ақтөбе облысының бұрынғы әкімі 8 жылға бас бостандығынан айырылды

Жер телімін заңсыз сатты деген күдікке ілінген Ақтөбе облысының бұрынғы әкімі және СПК Ақтөбе басқармасының төрағасы Ермек Имантаев сот үкімін тыңдады.

Сондай-ақ одан мемлекет кірісіне 199,5 миллион теңгеге жуық қаржы өндірілді.

«Мемлекеттік қызметте лауазымдарды атқару құқығынан өмір бойына айыра отырып, 8 жылға бас бостандығынан айыру жазасы тағайындалсын. Жазаны өтейтін орын ретінде орташа қауіпсіздіктегі қылмыстық-атқару жүйесі мекемесі тағайындалсын» деген үкімді судья Теміржан Алданов оқыды.

Облыстың экс-әкімі осы жылдың ақпан айында қамауға алынған болатын. Оған аса ірі көлемде бөтеннің сеніп тапсырылған мүлкін ұрлады деген айып тағылды. Атап айтқанда, ол «Ақтөбе СПК» АҚ басқарма төрағасы бола тұра, «Садовое» тұрғын алабындағы 24 гектар жер учаскесінің құнын  төмендетіп, заңсыз 20 миллион теңгеге сатып жіберген. Сотталушы өз кінәсін мойындамады.

Оның жанұясы апелляциялық шағым түсіретінін айтты. Сотталушы 28 қыркүйектен күні бүгінге дейін жариялаған аштық акциясына байланысты денсаулық жағдайы нашарлағандықтан, сот үкімін тергеу изоляторынан онлайн тыңдады.