Ақтөбе облысындағы Қойбағар көлінде балық қырылды

Ақтөбе облысы Ырғыз ауданы Құтикөл ауылындағы Қойбағар көлінде балық қырылды. Балық шаруашылығы инспекторлары оқиға орнында сынама алып жатыр, деп хабарлайды Orda.kz.

Қойбағар көлінде балық өліп жатқаны туралы видео әлеуметтік желіде тарады. Тұрғындар көлдің бетіне қалқып шыққан балықты көрсетті.

Оқиға орнына бүгін Тобыл-Торғай облысаралық бассейндегі балық шаруашылығы инспекциясының қызметкерлері барды. Инспекторлар Қойбағар көлінің өзегінен 70 келі өлі балық тапты. Өзек тереңдігі -1,8 метр бетіндегі мұздың қалыңдығы -35 см. Өлген балықтар Қойбағар көлінен Ащыкөлге ағатын  өзегінен шыққан.

«Оқиға орнына жергілікті атқарушы орган өкілдерімен бардық. Қарадық.Көл маңынан 70 келі балық шықты. Көлден және балықтан сынама алынды. Балықтың өлу себебі сынама нәтижесі арқылы анықталады.  Айта кетейін, бұл көл балық шаруашылығы маңызы бар су айдыны тізімінде жоқ.  2024 жылы көктемде су тасқынынан кейін пайда болған көл. Сол жердің атымен аталып жүр. Балық көлдің өзекшесінен шыққан», – деді Тобыл-Торғай облысаралық бассейндегі балық шаруашылығы инспекциясы басшысының орынбасары Береке Тағаев.

Автор: Ардақ Ерубаева