Ақтөбе облысында жоғалған баланың денесі табылды

Ақтөбе облысында жоғалып кеткен баланың денесі табылды, деп хабарлайды Orda.kz. Бұл туралы облыстық полиция департаменті мәлімдеді.

«Үздіксіз іздестіру шаралары нәтижесінде жоғалып кеткен кәмелетке толмаған Жетіру Кәрімнің денесі Елек өзенінен «Киіз үй» мейрамханасы аумағында табылды» делінген полиция хабарламасында.

Жоғалған баланы іздеу жұмыстары 4 күнге созылды.

Баланы іздеуге 500-ге жуық адам қатысты, оның ішінде полиция қызметкерлері, төтенше жағдайлар қызметі, еріктілер, сондай-ақ қызметтік иттер мен 40 техника, 3 квадроцикл, 2 қайық, 4 жылқы, ұшқышсыз ұшақтар пайдаланылды. Сондай-ақ үйлердің шатырлары мен аулалары, кәріз шұңқырлары тексерілді.

«Полицейлер тергеу жүргізіп, қажетті сараптамалар тағайындады. Полиция департаменті қайтыс болған баланың туыстары мен жақындарына көңіл айтады» делінген полиция хабарламасында.

Бұған дейін 13 жастағы баланың 4 маусым күні жоғалып кеткені хабарланған болатын. Атасы мен әжесіне қонаққа барған ол жеке үйдің ауласынан шығып кетіп, одан кейін оны ешкім көрмеген. Баланың аутизммен ауырғаны  белгілі болды.