Ақтөбе облысында вагондардың рельстен шығып кетуіне байланысты пойыздар кешігіп жатыр

Қазір Қауылжыр стансасында қалпына келтіру жұмыстары жүріп жатыр.

Бүгін, 27 наурызда сағат 10:00 шамасында Ақтөбе облысындағы Шалқар – Жем учаскесінде сегіз жүк вагоны рельстен шығып кетті.

«Қаза болғандар мен зардап шеккендер жоқ. Апат болған жерге қалпына келтіру пойыздары жөнелтілді. Апаттың себептерін арнайы комиссия анықтап жатыр»,  деп хабарлады «Қазақстан темір жолы» ҰК» АҚ баспасөз қызметі.

Вагондардың рельстен шығып кетуіне байланысты Алматы — Ақтөбе және Орал — Алматы бағытындағы жолаушылар пойыздары кешігіп жатыр.