Ақтөбе облысында полицей жанып жатқан үйден бір отбасын аман алып шықты

Ақтөбе облысында 1 наурыз күні таңертең Байғанин аудандық ішкі істер бөлімінің аға инспекторы Әділ-Қахар Қадіров өртеніп жатқан үйден көршілерін аман алып қалды, деп хабарлайды Orda.kz.

Айтуларынша, ер адам жұмысқа бара жатып, көрші үйден түтін шыққанын көрген. Полицей еш ойланбастан сол үйге барып, ішке кіріп, ғимараттың жанып жатқанын көреді.

«Әділ-Қаһар үй иесін айғайлап оятып, кәмелетке толмаған үш баланы бірінен соң бірін көтеріп сыртқа шығарды. Ол ең кіші бес жасар баланы көтеріп бара жатқан кезде есін жоғалтып, құлап қалған» дейді полициядағылар.

Осы уақытта оқиға орнына өрт сөндірушілер мен жедел жәрдем қызметкерлері жетіп, оған үйден шығуға көмектескен.

«Полицей улану салдарынан ауруханаға жатқызылды. Қазір ержүрек тәртіп сақшысының өмірі мен денсаулығына ешқандай қауіп жоқ» деп түсіндірді департаменттің баспасөз қызметі.