Ақтөбе облысында Қытайдың тәттісінен 23 оқушы уланды

Ақтөбе облысында бастауыш сыныптың 23 оқушы белгісіз тәттіні жеп уланып қалды, деп хабарлайды Orda.kz.

Оқиға 18 ақпан күні Ақтөбе облысы Қобда ауданының орталығында орналасқан Қобыланды батыр атындағы мектепте болды.  4-сыныптың 23 оқушысы бірінен соң бірі құсып, басы айналып, өздерін нашар сезінген соң түгелдей ауруханаға жеткізілді. Артынша анықталғандай, сол сыныптың  оқушылары қытайша жазуы бар тәттіні әкеліп бөліп жеген екен.

Қобда ауданы әкімдігі ішкі саясат бөлімінің басшысы Арман Қабыловтың айтуынша, оқушы белгісіз тәттіні мектептен тыс жердегі дүкеннен сатып алған. 

«Сол жерде жеті оқушының басы айналып, лоқсыр, бөртпе пайда болған. Сыныптың басқа балалары иістен өздерін жайсыз сезінген. Барлық бала бірден ауруханаға жеткізілді. Қазір жағдайлары жақсы» ,– деді Арман Қабылов.

Қазір Қобда аудандық ауруханасында 9 оқушы жатыр. Олар тағы бір күн дәрігердің бақылауында болады. 

«Кеше 23 баланы аудандық ауруханаға әкелді. Қытайдан шыққан белгісіз тәттіні жеті бала жеген, қалған балаларға иісі реакция берген. Бүгін таңертең облыс орталығынан педиатр барып тексерді. Тоғыз бала бүгінше бақылауда болады. Қалған оқушылар үйлеріне жіберілді», деп мәлімдеді Ақтөбе облыстық денсаулық сақтау басқармасы.

Аудан әкімдігінің хабарлауынша, барлық материалдар полицияға жолданған.

Бүгін тәттіден уланып түскен 9 оқушы ауруханадан үйлеріне шығарылды. Денсаулық сақтау басқармасы баспасөз қызметінің хабарлауынша, балалардың жағдайлары жақсы, анализдері таза. 14 күн бақылауда болады.

Автор: Ардақ Ерубаева