Ақтөбе облысында қылмыстық топ заңсыз онлайн-казино ұйымдастырған

Ақтөбе облысында заңсыз онлайн-казино ойынын ұйымдастырған қылмыстық топ анықталды, деп хабарлайды Orda.kz. 

Күдіктілер 2022 - 2024 жылдар аралығында ұйымдасқан қылмыстық топ құрып, «bingo37.pro» платформасы арқылы заңсыз ойын бизнесін басқарған. Платформа басшылары қатысушылардан ақшалай бәсті банктік аударым арқылы қабылдаған. Содан кейін оларды платформаға тіркеп, ойынға қатысу үшін логин, құпия сөз және сілтеме ұсынған.

Қылмыстық топқа заңсыз онлайн-казино қызметінен күн сайын 150 000 теңгеден 200 000 теңгеге дейін ақша түсіп отырған. Топтың жалпы қылмыстық табысы 306 миллион теңгеден асты. 

Қаржылық тергеу барысында күдіктілер заңсыз алынған ақшаға жалпы құны 66 миллион теңге болатын  «Toyota Land Cruiser» және «Lexus EC 250» маркалы екі автокөлік алғаны анықталды. 

Сотқа дейінгі тергеу жалғасуда. Күдіктілер ұсталды.