Ақтөбе облысында былтыр 250 млн теңгеге жөнделген бөгет тағы да бұзылды

Ақтөбе облысында көктемгі тасқын кезінде су шайған бөгет тағы да бұзылды. Бұл нысан бюджеттің 257 миллион теңгесіне былтыр ғана жөнделген, деп хабарлайды Orda.kz. 

Ақтөбе облысында былтыр ғана күрделі жөндеуден өткен бөгетті екінші рет су шайып кетті. Алға ауданындағы Көсем су қоймасына көктемде жобалық көлемнен екі есе артық су келген. Салдарынан бөгет бұзылып, жақын маңдағы елді мекендерге қауіп төндірді. Мердігер мекеме кепілдік мерзімі аясында нысанды қайта жөндеуі тиіс болған. Алайда, бұл жұмыстар биыл аяқталмады. Бұзылған екі учаскенің бірін қалпына келтіру үшін топырақтан уақытша жол салынып, құбыр төселді. Соңғы жауған жауын-шашын салдарынан ол аумақты да су бұзып кеткен. 

Бұл бөгеттің сыйымдылығы 76 мың текше метр. Енді мердігер компания уақытша жолды қайта салып, жұмысты одан әрі жалғастыруы тиіс. Егер міндеттемесін тиісті деңгейде орындамаса, мәселе сот арқылы шешіледі.