Ақтөбе облысында алты бала қызылша індетімен жансақтау бөлімінде жатыр

Ақтөбе облысында қызылша ауруы ушығып барады. Жыл басынан бері облыстың мыңнан астам тұрғыны қауіпті дертке шалдыққан. Қазір жансақтау бөлімінде алты сәби жатыр. Емханаларға қосымша төсек-орындар дайындалуда.

Ақтөбе облысында қызылша ауруының алғашқы оқиғалары ақпан айында тіркеле бастады, деп жазады Astanatv. Күзде ауру өршіге бастады. Барлық отбасылар емделуге ауруханаларға жатқызылады. Осыған орай облыстағы ауруханаларға қосымша төсек-орындар қосылды.

«Бүгінде бізде облыста 211 төсек, ересектер мен балаларға арналған облыстық ауруханаларда 91 және «Шағала» шипажайында 120 төсек бар. Соңғы 10 күнде мұнда күніне орта есеппен 20 жағдай тіркелді»,  - деді Денсаулық сақтау басқармасы басшысының орынбасары Бақытжан Түлкібаев.

Қазір «Шағала» шипажайында 82 адам емделуде. Басым көпшілігі балалар. 6 сәби жансақтау бөлімінде жатыр. Дәрігерлердің айтуынша, ауру жұқтырған балалардың 70 пайыздан астамы екпе алмаған. Ал мұндай жағдайларда ауру әлдеқайда ауыр. Дәрігерлер қызылшаның өте жұқпалы ауру екенін ескертеді.

Вакцина алмаған адам оны 100% ықтималдықпен жұқтыруы мүмкін. Аурудың айтарлықтай өскеніне қарамастан, облыстағы балабақшалар мен мектептер карантинге жабылмаған. Қызылша анықталса, жұқтырған бала оқшауланады, ал қалған балалар 21 күн бойы бақылауда болады.