Ақтөбе мұнай жабдықтары зауытын қазір кім бақылайды?

«Ақтөбе мұнай жабдықтары зауыты» АҚ-ның бақылауы Айдар Аманжоловқа өтті. Бұл туралы Orda.kz хабарлайды.

30 желтоқсанда Қазақстан қор биржасының (KASE) сайтында жарияланған құжатқа сәйкес, кәсіпорынның акционері ретінде «KazMetalInvest» ЖШС-ның жалғыз құрылтайшысы әрі басшысы Айдар Аманжолов көрсетілген. Қазір бұл компания зауыттың дауыс беретін акцияларының басым бөлігін бақылайды.

Сол құжатта кәсіпорын акционерлеріне төленетін дивиденд көлемі де көрсетілген — 890,6 млн теңге. Салыстыру үшін, АЗНО-ның 2024 жылғы 1 қазандағы жағдай бойынша таза пайдасы 980,6 млн теңгені құраған.

Бұған дейін зауытты Ortabasy Group компаниясы бақылаған. 

Енді «Ақтөбе мұнай жабдықтары зауытының» негізгі акциялар пакеті Айдар Аманжоловқа KazMetalInvest арқылы тиесілі. Бұл ретте компания сәуір айында ғана тіркелген және бүгінге дейін 18,5 мың теңге салық төлеген.

Кәсіпорынды бақылаудың ауысқаны туралы ақпарат KASE сайтында 30 желтоқсанда жарияланған құжаттардан белгілі болды.