Баллон жарылды: Ақтаудағы ұшақ апатына қатысты соңғы деректер

Ақтау маңындағы әуе апатында зардап шеккендер саны 29 адамға жетті, олардың ішінде екі бала бар. Бұл ақпаратты Маңғыстау облысы денсаулық сақтау басқармасы берді, деп хабарлайды Orda.kz тілшісі.

ҚР көлік министрлігі дерегіне қарасақ ұшақта 62 жолаушы, 5 экипаж мүшесі болған. Ұшақ құлаған жерден 4 адамның мәйіті табылды.

Маңғыстау әкімдігінің мәліметіне сүйенсек, ұшақта болған 67 адамның 29- аман, бірақ зердап шеккен 27 адам Маңғыстау облыстық ауруханасына жеткізілді.

Басқарма өкілдері апат кезінде ұшақ бортында жарылыс болғанын хабарлады.

«2024 жылғы 25 желтоқсанда, шамамен 10:58-де Баку – Грозный бағыты бойынша ұшып бара жатқан ұшақ апатқа ұшырады. Ұшақ бортында баллон жарылып, 14 адам зардап шекті, оның ішінде екі бала бар», деп мәлімдеді басқарма.

Оқиға орнына көмек көрсету үшін 22 жедел жәрдем бригадасы мен апат медицинасы орталығының алты бригадасы жіберілді.

«Облыстық көпбейінді ауруханада 30 хирургиялық және травматологиялық төсек-орын, сондай-ақ 10 реанимациялық орын дайындалды. Балалар ауруханасында 20 төсек-орын мен 10 реанимациялық орын ашылды»,
– деп толықтырды басқарма өкілдері.

Қазіргі уақытта ауруханаға 27 адам жеткізілді, олардың 11-і ауыр халде реанимация бөліміне ауыстырылған.

Сонымен қатар, 11 жастағы бала мен 16 жастағы жасөспірім де ауруханаға жатқызылды. Дәрігерлер мен құтқарушылар зардап шеккендерге көмектесіп жатыр.