«Ақтаудағы сарбаздың өлімі»: Марқұмның әкесі әділ тергеу талап етіп жатыр

Ақтау гарнизонының 25744 әскери бөліміне мерзімді әскери қызметін өтеуге жалғыз ұлын жіберген отбасына баланың мүрдесі қайтыпты. Енді Маңғыстау облысындағы полигонда қаза тапқан сарбаздың әкесі Қорғаныс министріне ашық үндеу жолдап, істің мұқият әрі тәуелсіз тергелуін сұрады, деп хабарлады Orda.kz.

Марқұмның әкесінің айтуынша, ұлының өлімі кездейсоқ емес, офицер әдейі атқан.

«Ұлымды бетіне оқ атып өлтірді. Бұл жай кездейсоқтық емес», — деді ол бейнеүндеуде ашына сөйлеп.

Ол қарудың өздігінен атылмайтынын, ату үшін оқтап, сақтандырғышты алып, шүріппені басу қажет екенін атап өтті.

Әкесі істі жауып, бұл оқиғаны кездейсоқ өлім деп көрсетуі мүмкін деп алаңдап отыр. Ол Қорғаныс министрінен тергеуді жеке бақылауға алып, шындықтың ашылуын талап етті.

Сарбаз полигонда оқ тиген соң, жарақат алып, ауруханаға барар жолда көз жұмғаны белгілі болды.

Әскери гарнизонның ресми мәліметіне қарасақ, қайғылы жағдай қаруды дұрыс пайдаланбағаннан болған.

Қаза болған сарбаз 19 жаста және отбасындағы жалғыз ұл болыпты.

Еске сала кетсек, бұған дейін Orda.kz әскерден мүгедек болып қайтқан Ербаян Мұхтардың жақындарымен сұхбаттасқан болатын.