Ақтауда ұшақ апаты: марқұм бортсеріктің әкесі кінәлілерге өлім жазасын талап етті

Ақтау маңында құлаған AZAL ұшағында қайтыс болған бортсерік Хёкума Алиеваның әкесі ұшақтың апатқа ұшырауына себепші болғандарға өлім жазасын талап етті, деп хабарлайды Orda.kz.

modern.az мәліметінше, Хёкума Алиеваның әкесі Джалил Алиев  ұшақты атып түсіргендерге ең ауыр жаза қолданғанын қалайды.

«Үкімет қажетті барлық шараларды қолданар, егер мені сотқа шақырса, мен ең жоғары жаза талап етемін. Мені әлі күнге олар неге біздің ұшақты атып түсірді деген сұрақ мазалайды. Кез келген ата-ана өз баласы үшін өмірін беруге дайын. Мен жауапты адамдарға өлім жазасы кесілгенін қалаймын», - деді мерт болған бортсеріктің әкесі.

Сонымен қатар, Ақтау маңында апатқа ұшыраған ұшақта Хёкума Алиева мен бірге ұшқыштар Игорь Кшнякин мен Александр Кальянинов та мерт болды. Оларға «Әзірбайжан ұлтының қаһарманы» атағы берілді.

Күні кеше ғана Қазақстанның көлік министрлігі Ақтау маңында апатқа ұшыраған AZAL ұшағына қатысты алдын ала тергеудің есебін жариялады.