Ақтауда полицейдің қызын зорлап сотталған жігітке апелляциялық сот шешімі шықты

Ақтауда 21 жастағы жігіт кәмелетке толмаған қызды зорлағаны үшін 15 жылға сотталды. Жігіт сот шешіміне қарсы шығып, апелляциялық шағым түсірді, деп хабарлайды Orda.kz. 

Алайда апелляциялық сот шешімді өзгеріссіз қалдырды. 2025 жылдың ақпан айының басында Маңғыстау облысының ауданаралық қылмыстық соты 21 жастағы азаматқа үкім шығарды. Ол ҚР Қылмыстық кодексінің 120-бабы («зорлау») бойынша кінәлі деп танылып, 15 жылға бас бостандығынан айырылған еді. Сотталған жігіттің ата-анасы ұлының 17 жастағы қызбен кездесіп, оған үйленетінін айтқан. Алайда қыз уақыт өте келе ойынан айнып қалған екен. Кейіннен жәбірленушінің есірткі қылмысына қарсы күрес саласында жұмыс істейтін жоғары дәрежелі полицейдің қызы екені белгілі болып шықты. 

Сот барысында жәбірленуші жігіттің оны күшпен жыныстық қатынасқа түсуге мәжбүрлегенін, еркінен тыс шешіндіргенін және әлеуметтік желілерде компромат жариялаймын деп қорқытқанын айтты. 

Сот жабық режимде өтті. Апелляциялық алқа үкімді күшінде қалдырды. Бұл ақпаратты Orda.kz тілшісіне Маңғыстау облыстық сотының баспасөз қызметі растады.