Ақтауда бір топ нашақор зорлап, артынша суицид жасаған фитнес-бапкерге қатысты апелляциялық сот қалай өтті?

Бір топ нашақор ұрлап кетіп зорлаған, ақырында суицид жасап қайтыс болған 29 жастағы Алина Серіковаға қатысты апелляциялық сот процесі басталды, деп хабарлайды Orda.kz.

Бірінші соттың шешімімен бес айыпталушы ұзақ мерзімді жазаға тартылды, бірақ марқұмның отбасы үкім жеткілікті қатал болмады деп есептейді. Алина Серікованың туыстары іс бойынша басты фигурантқа өмір бойы бас бостандығынан айыруды талап етуде. Ал қалған сотталушыларға 15–16 жыл жаза берілуі керек деп санайды. Бүгін жәбірленуші тарап соттан үкімді жариялау кезінде БАҚ өкілдерінің қатысуына рұқсат беруді сұрады, алайда сот алқасы бұл өтінішті қанағаттандырмады.

Бұған дейін, апелляциялық сот процесі екі рет кейінге шегерілді, бірінші рет айыпталушылардың бірінің адвокаты келмегендіктен, екінші рет айыпталушы қорғаушыдан бас тартты. Бүгін сот отырысы ақыры басталды.

Еске сала кетейік, 2024 жылдың мамырында Ақтауда бес ер адам Алина Серікованы жұмыстан қайтып келе жатқан кезінде көшеден ұрлап әкеткен.  Қызды көлікке салып, түн бойы қалада арлы-берлі жүріп, оған қорлық көрсетіп, артынша зорлаған.

Кейін олар оны онлайн-кредит рәсімдеуге мәжбүрлеп, ақшаны алып, босатып жіберген. Алайда, басынан өткен жағдайды көтере алмаған Серікова тоғызыншы қабаттан секіріп, көз жұмды. Өлімінен бұрын ол болған оқиға туралы досына және туған ағасына айтып үлгерді.